Psa 138 | IboBIU | STEP | Abụ Ọma Devid. O Onyenwe anyị , aga m eji obi m niile too gị; nʼihu chi niile dị iche iche ka m ga-abụku gị abụ otuto.

Psalms 138

Abụ Ọma Devid.

Onyenwe anyị bụ onye kwesiri ntụkwasị obi

1 O Onyenwe anyị, aga m eji obi m niile too gị;
nʼihu chi niile dị iche iche ka m ga-abụku gị abụ otuto.
2 Aga m akpọ isiala nʼebe ụlọnsọ ukwu gị dị
aga m etokwa aha gị
nʼihi ịhụnanya gị na ikwesi ntụkwasị obi gị,
nʼihi na i meela ka aha gị na okwu gị
dị elu karịa ihe niile. ^a
3 Mgbe m kpọkuru gị, ị zara m;
i mere m ka m nwee nkwuwa okwu ma guzosiekwa ike.

4 O Onyenwe anyị, ka ndị eze niile nọ nʼụwa too gị,
mgbe ha nụrụ ihe niile i nyere nʼiwu.
5 Ka ha bụọ abụ banyere ụzọ niile nke Onyenwe anyị,
nʼihi na ebube Onyenwe anyị dị ukwuu.

6 Nʼagbanyeghị na Onyenwe anyị dị ukwuu, ọ na-elekwasị ndị dị umeala nʼobi anya,
ma ọ naghị ekwe ka ndị nganga bịa ya nso.
7 A sịkwarị na m na-eje ije nʼetiti nsogbu,
ị na-echebe ndụ m;
ị na-esetipụ aka gị megide iwe ndị kpọrọ m asị,
ị na-eji aka nri gị zọpụta m. ^b
8 Onyenwe anyị ga-emezuru m ihe niile o kwadoro m; ^c
ịhụnanya gị, o Onyenwe anyị, na-adịgide ruo mgbe ebighị ebi,
ahapụkwala ọrụ aka gị niile.